Kiva nodo 50 toun do kinododizan tokou do momolinta sosondi. Minonuidong tokou miampai tohu pogun, ih pogun do Malaya, Singapore om Sarawak, do pogun kavavagu, ih nopungaanan do Malaysia di ko-16tv do Vuhan ko-Sizam, toun 1963 nga di toun 1965, sinugagang di Tengku Abdul Rahman oh Singapore do huminabus; Sabah om Sarawak nga humabus nogi nga nimangan disido undoonoko do manangod miampai do kapal susumangod om askar doid tanah om id daat.
Mantad dii do nimangan ahanai dioho oh Polimbagaan do Malaysia do mooi au kohosod oh tuhun do Kadazan om Iban do momolinta, tudu nopo kozo dioho nga magavi di kazu, tumau, amas om pinuavangan id saahom daat, tanah om suang tahun do oviton dioho do popobu'u om monunda do POGUN dioho sondi om agama do Islam, ih potongkopon dioho id okon nopo id Malaya nga id Sabah om Sarawak.
Kiva do pipio oh sogu do monuidong iso sikul takavas (Univversity) montok tanak ngaavi do Kadazan, hohobi po kopizo di au kaanu do popougad do tanak dioho id soboong daat do mongoi pokinoboos, do mongoi kadampot om kogusa izioho do toihaan om kabaan do tinau do suvai nga au notuhuk ii tu osizan izioho do otunda om kobu'u iti dotokou do tinau om kabaga do pinandai do tanak dioho. Kotoos ngaavi do Sabah nga mavi-avi no do nimangan dioho panakao om tangazai, okon ko pipio lizong nga lizong mihapau do lizong toi id boos do Ongilis "trillion" oh gantang do tumau, kazu, amas, tambaga, ssp nga so-usin ih oh nakataak montok do koponuidangan do University montok dotokou nga aiso. Nokuo? Nombo no ngaavi ih huguan siou, huguan gazo, huguan tindama - songian nopo ngaavi do kopihi, nohiivan dioho oh tinau sondii, tangong jawab dioho montok do tuhun dioho, minogia'au do dumadi do montili, momogusa do pinuavangan sosondii, om minokikiazou do miampai gaa ngaavi do Datuk, Tan Sri, Tun, aiso tongoiso do miningkakat om huminaad pasal do KADAZAN CHRISTIAN UNIVERSITY.
NUNG KALATI KO DITI, ONDOMO ID NOMBO KODIMPOTO DOTOKOU NUNG SUMANSUT NGAAVI OH TIKIU TOKOU MIAGA DI TASU DO KINUAPON.
